horror story https://heartattackinghorror.tk/

1. namaskar, aap hain, heart attacking horror par, aur aaj aap sunege sazaaye maut ka doosaraa bhaag.
pahle bhaag ka link description me hai. kya aap kaale jaadoo ke chakkar me pade hain kabhi? kitna
kaargar hota hai kaalaa jadoo? aur kya asar hota hai, jab kaalaa jadoo ulta pad jaye? chalte hain kahaani
ki or. nileshwar chupchap aakar apne bistar par let jata hai. vah soch vichar karne lagta hai. aise
drashyon ko dekh kar uski neend gaayab ho chuki hai. soch vichar karte karte kaafi samay beet jata hai.
Kuchh der baad, kisi ke chillaane ki aawaaz se uska dhyaan tootataa hai. vah uthkar baith jata hai. idhar
udhar dekhne par use sabhi log sote hue nazar aate hain. chillaane ki awaaz abhi bhi aa rahi hai. ye
aawaaz Kuchh doori se aa rahi hai. nileshwar uthataa hai aur us disha ki or chal deta hai. jangal ki
andheri raat me use Kuchh bhi nazar nahin aa raha hai. hawaa bhi bilkul shaant hai. chalte chalte Ek ped
ke paas pahunchte hi, aawaaz band ho jati hai. nileshwar ruk jata hai. andhere me, vah idhar udhar
dekhne ki koshish karta hai. use Kuchh bhi dikhaaii nahi deta hai. vah Ek ped ke neeche khada hai.
achaanak se koi use peechhe ki taraf kheenchta hai. achaanak se hue is hamle me vah sambhal nahi pata
hai. koi use zordaar jhatke ke sath patak deta hai. jisase nileshwar ghaayal ho jata hai. vah dekhta hai,
saamane ek ajeeb sa praandi khada hai, jo na to insaan dikhai de raha hai, aur na hi shaitaan lag raha hai.
uski banaavat kisi insaani jeev ki tarah hai. vah bahut bhayanak lag raha hai. uska chehra ajeeb
jaanwaron jaisa hai. uska shareer insano jaisa hai. uske shareer par baal hi baal hain. use dekh nileshwar
chillaane ki koshish karta hai, lekin vah jeev uska tetua daba deta hai. Kuchh der baad nileshwar mar jata
hai. ab vah jeev nileshwar ko khane lgta hai. kuch der baad Rajesh vahan pahunch jata hai. nileshwar ki
haalat dekh vah muskurata hai. achaanak se insaani jeev ki nazar Rajesh par padati hai. Rajesh ko dekhte
hi vah bhaag jata hai. achaanak se mantrochaar ki aawaaz se nileshwar ki aankh khulti hai. vah Dara hua
hai. vah apne aap ko bistar par paata hai. vah dekhta hai, uska dost Rajesh aur kabeelewale hawan kar
rahe hain. subah ho chuki hai. nileshwar ko lagta hai, shayad vah sapna dekh raha tha. dheere dheere
uski haalat saamaany hoti hai. uthakar fresh hone ke baad, sabhi log falon ka naaashta karte hain, uske
baad sabhi log aaraam karne lagte hain. dopahar ka samay hai. sabhi log pedon ki chhaanv me lete hue
hain. nileshwar so jata hai. shaam ho jati hai. dheere dheere raat ho jati hai. raat ko sabhi log kha pikar
so jate hain. nileshwar din me khoob soya hai, isiliye use neend nahin aa rahi hai. vah lete lete taaron ko
dekh raha hai. achaanak se use rone ki awaaz sunaaii deti hai. vah uthkar baithta hai. vah dekhta hai,
saamne ek drashya chal raha hai, jisme uski familywaale ro rahe hain. nileshwar ko saza hone ke baad,
aas paas ke logon ke dwara aur pulis ke dwara, uski family ko bahut prataadit kiya Jane laga. jiski vajah
se aaj raat uski familywalon ne apna purana ghar chod diya aur ekaant me bane naye makaan me rahne
lage. sabhi ko rota dekh, nileshwar ki aankh me aansoo aa jate hain. ab drashya gaayab ho jata hai.
nileshwar paari raat so nahin pata hai. vah apni family ko lekar chintit hai. subah ho jati hai. nileshwar
bhi normal ho jata hai. ab vah aur Rajesh, dono log hawan poojan me shamil hone lage. aaj se dono log
kaalaa jadoo sekhane lagte hain. din me nileshwar raat ke drashya wali Ghatna ko Chandrasekhar ko
bataata hai. Chandrasekhar koi jawaab nahin deta hai. din guzar jata hai. raat me kha pikar sabhi log so
jate hain. agli subah sabhi log hawan karte hain, uske baad Anya kaam. ab sab Kuchh saamaany chalne
lagta hai. dheere dheere nileshwar aur Rajesh bhi kaalaa jadoo sekhane lagte hain. Kai din beet jate hain.
ab rajesh aur nileshwar, kaafi parangat ho chuke hain, kaale jadoo me. Ek shaam ko Chandrasekhar,
nileshwar ko Ek khushkhabri deta hai, ki kabeelewalon ne, un dono ke liye Ek naav banaai hai, jo dono ko
samudra ke raaste Hindustan pahuncha degi. uske baad dono log apne apne ghar ja sakte hain. ye baat
sunkar nileshwar aur Rajesh bahut khush hote hain. agli subah hi dono ko naav se rawana hona hai,
isiliye sabhi log raat me jaldi se kha pikar so jate hain. raat baarah baje nileshwar ki aankh khulti hai.

2. uske saamne Ek drashya chal raha hai. vah dekhta hai, uski familywalon ne zahra khakar aatmhatya kar li.
iske baad drashya gaayab ho jata hai. ye drashya nileshwar ko andar se jhankjhod deta hai. use Kuchh
bhi samjh nahi aa raha hai. achaanak se use Kuchh samjh aata hai. vah uthaata hai aur Kuchh door tak
jata hai. Ek ped ke neeche baithkar Kuchh pattiyaan ikattha karke unhe paththaron se ragad kar jalaata
hai aur aankh band kar Kala jadoo karne lagta hai. baaki sabhi log apni apni jagah par so rahe hain. kisi
ko bhi iski khabar nahin hai. Ek ghante baad achaanak se use apne kandhe par kisi ka haanth mahsoos
hota hai. vah aankh kholkar dekhta hai. uske peechhe rajesh khada hai. Rajesh, nileshwar se pooja karne
ka kaaran poochhta hai. nileshwar koi jawaab diye bina, uthata hai aur uske sath jakar bistar par let jata
hai. subah ho jati hai. saare kabeelewalon ne nileshwar aur Rajesh ko apni poshaak aur apne rang me
rang diya. nileshwar Kuchh gumsum hai. uske baad sabhi log samudra ke kinare jate hain. vahan pahle se
hi bani ek naav khadi hai. kabeelewale dono ke liye kaafi fal baandh dete hain. ab dono log naav par
sawaar ho jate hain. naav chalne lagti hai. haanth hilakar sabhi log Ek doosare ka abhivaadan svikaarate
hain. kabeelewale jangal me vaapas chale jate hain. nileshwar aur Rajesh naav lekar chalte ja rahe hain.
chalte chalte din guzarne lagte hain. bhoonkh mitane ke liye phalon ka sewan karte hain. kabhi baarish
hoti, kabhi bahut dhoop hoti, par ghar pahunchne ki aas ne dono ko majboot bana rakha hai. dono ki
daadhi kaafi badi ho jati hai. dheere dheere do mahine beet jate hain. Ek din unki naav ek kinaare se
takraati hai. dono log so rahe the. jhatke se unki neend tootati hai. kinaara dekh donon bahut khush
hote hain. kinaare pahunchkar dono ne zameen ko chhoomaa aur uske baad chalna shuru kar dete hain.
ab ghar to inka bahut door hai. vahaan paidal pahunchna inke bas ki baat nahi hai, isiliye kabhi Kuchh
door paidal jaate, to kabhi kisi ki bailgaadi par baith jate, jab thak jate, to kisi ped ke neeche letkar so
jate hain. bhoonkh lagne par maang ke kha lete, ya pedon ke phalon ko todkar kha lete hain. hote hote
Ek mahine baad nileshwar apne naye ghar par pahunch jata hai. dono logon ke baal aur daadhi bahut
badi badi hai. ghar me uske parivaarwale maujood hain, par use koi pahchaan nahin pata hai. vah apna
parichay deta hai, phir bhi use koi pahchaan nahin pata hai. ab nileshwar aur Rajesh ghar se baahar nikal
jaate hain. baahar nikalkar nileshwar kaafi soch vichar karta hai, uske baad apne dost rajesh ko lekar
apne purane ghar par pahunch jata hai. puaarane ghar bhi kaafi jagah me bana hua hai, lekin sabh Kuchh
kachha bana hua hai. nileshwar, Rajesh se kahta hai, dost aaj raat yahin guzar Lo, phir kal tum apne ghar
chale Jana. ye sunkar Rajesh rone lagta hai. nileshwar use chup karaataa hai aur uske rone ka kaaran
poochhta hai. jawaab me Rajesh kahta hai, mera ghar, parivaar nahi hai. vah rod par sota tha, logon ki
majoori karke apna pet paalta tha. ye sunkar nileshwar kahta hai, koi baat nahin, tum mere sath yahan
rah sakte ho, ab ham dost hain, aur hame koi pahchaanta bhi nahi hai, agar koi poochhata hai, to bata
denge ki nileshwar ke door ke rishtedaar hain. haan me sir hilakar, dono log ek kamre me ghus jate hain.
andar do chaarpaai khadi hain. dono log Ek Ek chaarpaai par so jate hain. agli subah uthakar dono log
kaam ki talash me nikal jaate hain. din bhar majdoori karne ke baad shaam ko nukkad Se khaana khaane
ke baad dono log ghar chale aate hain, aur so jate hain. ab yahi in dono ka roj ka niyam ho gaya. din bhar
kaam karte, sham ko khate aur raat me ghar aakar so jaate. yahi karte karte kaafi saal beet jate hain. tab
se aaj tak dono ne, na to apne baal katvaae aur na hi daadhi banvaai. ab dono ki umra badhane lagi hai.
dono bujurg ho chale hain. unka shareer dhalane lagta hai. dono ki umra lagbhag saath ke aaspaas ho
chuki hai. ek shaam, nileshwar aur rajesh rod par ghoom rahe hote hain. ghoomte ghoomate dono log
Ek tiraahe par pahunchte hain. nileshwar thak chuka hai, isiliye vahin baithkar aaraam karne lagta hai,
lekin rajesh nahin thaka hai. vah nahi rukta hai. vah aage nikal jata hai. Kuchh door nikalne ke baad,
achaanak se angrejon ki Ek kaar rajesh ka eksident kar deti hai. vah vahin dam tod deta hai. Kuchh doori

3. par baitha nileshwar ye dekh kar daudata hua aata hai, tab tak angrej ki kaar chali jati hai. bujurg
nileshwar rone lagta hai. vah apne dost ko gale se laga Leta hai. raat hone lagti hai. Kuchh logon ki
madat se Rajesh ki ded body ko nileshwar ke ghar laaya jata hai. raat ke das baje pados ke log nileshwar
aur Rajesh ko chhodkar apne apne ghar chale jate hain, ye sochkar ki body ka antim sanskaar agle din
hoga, raat me body jalana ya dafnaana, dharm ke virudhh hai. ab ghar me sirf nileshwar aur uska Mara
hua dost rajesh bache hain. Rajesh ki body aangan me rakhi hai. nileshwar uske paas baitha hua ro raha
hai. vah kabhi rota, to kabhi shaant ho jata. achaanak se uske dimaak me Kai saal pahle, kaala paani ke
taapoo par dekhe gaye drashya ki yaad aati hai. vah samajh nahi pa rha hai, kyonki Chandrasekhar ke
bataaye anusaar vahaan dekha gaya drashya das minat baad ghatit ho jata hai, lekin ye Ghatna Kai saal
baad ho rahi hai. ye baat soch sochkar vah bahut hairaan hai. achaanak se Ek khayaal ne usko utha diya.
vah uthkar apne dost ko kheenchta hua apne kamre me le jata hai. mombattee ki roshani ko beech me
jalaakar, ek taraf uske dost ki body hai, aur doosaree taraf khud baith jata hai. vah aankh band karke
Kuchh mantra padhne lagta hai. kaafi samay baad vah kaala jadoo kar raha hai. Kuchh der mantrochaar
ke baad vah aankh kholkar Rajesh ko dekhta hai. Rajesh ki body vaisi hi leti hai. vah phir se ankh band
karke mantra budbudaata hai, aur Kuchh der baad phir se ankh kholkar dekhta hai. Rajesh vaise hi Leta
hai. nileshwar Kai baar yah prakriya dohraata hai, lekin Rajesh me koi halchal nahin hoti hai. do baje ke
kareeb nileshwar vahin zameen par hi so jata hai. raat beet jaati hai. subah saat baje nileshwar ki aankh
khulti hai. vah apne aap ko apne bistar par paata hai. use apna dost Rajesh kahin nazar nahi aata. vah
uthkar apne kamre se bahar aata hai. baahar nikalte hi uske hosh udh jate hain. use apni familywaale
nitya kaamo me vyast nazar aate hain. jinhe dekh use achambha hota hai. vah poore ghar me Rajesh ko
dhoondhta hai, par asafal rahta hai. uske is kaam me gharwaale tokate bhi hain, lekin vah koi jawaab
nahin deta hai. ab vah nahane dhone lagta hai. naha dhokar jab vah sheeshe ke saamane pahunchtaata
hai, achambhit ho jata hai, kyonki vah saath saal waala nileshwar nahi, balki chaalees saal pahle walaa
nileshwar hai. ab vah bees saal ka nileshwar hai. ab use yaad aata hai, ki chaalees saal pahle uske
familywaale jaise dikhaaii dete the, bilkul vaise hi, baahar maujood familywaale hain. ye saara
ghatnakram nileshwar ki samajh ke baahar hai. iske aage ki kahani aap agle bhaag me sunenge. agar
kahaani achhi lage, to channel ko subscribe zaroor Karen. nai nai kahaaniyon ki update paane ke liye bell
icon pres Karen. milte hain agli kahaani me, tab tak ke liye, dhanyawaad.