1. DÍA INTERNACIONAL DAS PERSOAS CON DIVERSIDADE FUNCIONAL
A Asociación AMBAR das Persoas con Diversidade Funcional, con motivo da
celebración o 3 de DECEMBRO, do DÍA INTERNACIONAL DAS PERSOAS CON
DIVERSIDADE FUNCIONAL, fai público este MANIFESTO, presentando ante a Sociedade
a percepción do colectivo sobre a equiparación de oportunidades das persoas con
diversidade funcional na comarca de Barbanza e as demandas dos seus
representados.
MANIFESTO:
AMBAR con motivo do tres de decembro DIA INTERNACIONAL DAS PERSOAS CON
DISCAPACIDADE, neste ano 2010, observamos que ademais das vellas cuestións sen
resolver que dificultan o desenvolvemento da vida autónoma das persoas con
diversidade funcional, e ante a crise global, é necesario sinalar que existen marcos
normativos globais que esixen realizar políticas inclusivas para dar solucións aos
vellos problemas, e que actuar positivamente pola inclusión e pola diversidade
permitirá maior igualdade de oportunidades relanzando o desenvolvemento social e a
reactivación económica, e esto é algo que podemos e debemos comezar a facer agora
na nosa comunidade local garantindo que todos poidamos vivir como cidadáns de
pleno dereito, e MANIFESTA:
1.- A PESAR da vixencia da CONVENCIÓN SOBRE OS DEREITOS DAS PERSOAS CON
DIVERSIDADE FUNCIONAL, constatamos nos trinta meses de vixencia da mesma, o
descoñecemento deste marco legal e os seus efectos para o colectivo de persoas con
diversidade funcional. Reivindicamos a creación de órganos locais nos que teñan voz e
capacidade de decidir o colectivo ao que representamos.
2.- A PESAR da existencia de lexislación en materia de promoción da accesibilidade
atopamos que os nosos pobos e aldeas presentan contornas inaccesibles en canto a
edificación e mobiliario urbano. Esiximos que as persoas con diversidade funcional
poidan facer uso de todos os bens e servizos da comunidade en igualdade de
oportunidades.
3.- A PESAR da existencia desta mesma lexislación e da específica en materia de
transporte, hoxe en día denunciamos a imposibilidade de utilizar transporte público
Interurbano. Esiximos que as administracións públicas competentes nesta materia
promovan estes servizos e adxudiquen exclusivamente a aquelas empresas que
cumpran cos requisitos de accesibilidade.
4.- A PESAR da existencia de lexislación en materia de INCORPORACIÓN DE PERSOAS
CON DIVERSIDADE FUNCIONAL O MERCADO LABORAL ORDINARIO, atopamos que se
segue asociando a imaxe do traballador ou traballadora con diversidade funcional ao
emprego protexido exclusivamente, polo que esiximos unha adecuada coordinación
entre os axentes políticos, empresariais, sindicais e educativos para garantir o acceso
ao emprego normalizado. Expoñemos ás administracións locais que exemplifiquen a
inclusión laboral mediante a incorporación visible e notable de persoas con
diversidade funcional nas súas plantillas de persoal.
Manifesto Asociación AMBAR
Día Internacional das Persoas con Diversidade Funcional 1

2. 5.- A PESAR da traxectoria histórica do movemento asociativo e do marco legal
conseguido, á nosa comunidade quedalle aínda un longo camiño por percorrer en
canto á plena participación, equiparación de oportunidades e cidadanía plena das
persoas con diversidade funcional. Consideramos que a forma de avanzar neste ámbito
é o auténtico compromiso das administracións públicas para facer cumprir A
CONVENCIÓN. Esiximos ás administracións públicas que adopten a Convención e
apliquen os recursos necesarios para o seu coñecemento e desenvolvemento.
6.- A PESAR de que a natureza das persoas é vivir en sociedade, aínda son moitas as
persoas que cando dependen doutras para conducir as súas vidas, para moverse ou
levar a cabo as súas actividades, son confinadas en residencias inadecuadas,
segregándoas en instalacións onde se lles rouba o control sobre as súas propias vidas e
se apartan da visión da sociedade corrente e da participación. Esiximos que a nosa
xente teña a oportunidade de elixir o seu lugar de residencia e onde e con quen vivir,
en igualdade de condicións coas demais, e non se vexan obrigadas a vivir con arranxo
a un sistema de vida específico.
7.- A PESAR de que a Convención no seu artigo 24 obriga a garantir a educación
inclusiva das alumnas e alumnos con diversidade funcional, observando os principios
de normalización, igualdade de oportunidades, non discriminación, accesibilidade
universal, provisión de apoios, calidade e equidade que compensen as desigualdades,
séguense habilitando recursos especiais para segregar persoas con diversidade
funcional, perpetuando unha educación que desvalora ás persoas diferentes desde a
infancia. Demandamos a adopción das medidas económicas necesarias para asegurar
que ningún alumno ou alumna con diversidade funcional se vexa privado, por falta
de recursos, do dereito a acceder a unha educación inclusiva de calidade.
Por estes motivos AMBAR vai continuar o seu labor pola equiparación de
oportunidades das persoas con diversidade funcional colaborando a todos os niveis na
realización das políticas sociais pola inclusión, desde a transversalidade, evitando
medidas segregadoras que exclúen e invisibilizan á nosa xente, tendo como eixo
principal de actuación o VIVIR INCLUÍDOS NA COMUNIDADE. E facemos un
chamamento á comunidade para que se sumen o labor de AMBAR facendo os nosos
pobos máis inclusivos e respectuosos coa diversidade, máis humanos.
Tres de decembro de 2010
Manifesto Asociación AMBAR
Día Internacional das Persoas con Diversidade Funcional 2